Bampangi ya munu, mbote ya beno.
Bubu yayi mu zola kumoka na beno samu ti mua bilumbu me luta mingi. Mu ke budila beno mua disolo yayi.
Matanga ya mama Tsimba
Bakala ya mama Tsimba kufuaka mpe yandi luataka pidi samu ti dikanda na bukoko me zola ti yau ku salama mutindu ina, konso tangu muntu ke kufuaka na dikanda. Kana yau kele bakala ya fuana lutila diaka.
Mama Tsimba vuandiki kitoko, yandi luataka bilele mosi ya kafu-kafu, maputa zole na kanzako mosi vuandi lakisa zulu ya ntulu ya yandi, kasi mabene ve. Ya vuandiki kitoko, kasi buzitu ya nzutu ya yandi vuandiki kaka. Nsuki na intu, yayi kitoko ! Ba kangaka yandi suki ya maboko ya fioti fioti mutindu ba nkento ya buala me zaba kusala yau.
Na ngunga kumi na tanu na ndambu ya nkokila, mutindu ba sonikaka yau na mukanda ya kubokila bantu na matanga, Mama Ntsimba basikaka na bana ya yandi na manima, ba vuandi bina na nzimbu ya Zao.
Tangu ba kumaka na sika ina ba bongisaka kifulu samu na mama na bana ya yandi, bau vuandiki me baka kifulu ina nzimbu manisaka. Kasi bampangi, bantu vuandiki mingi ve.
Na buala mutindu beno zaba yau, bantu ke kuizaka na matanga kaka na manima ya tangu ina ba sonikaka na mukanda. Ba lenda kuma ata na manima ya ba ngunga tatu to tanu. Kasi kilumbu ina , Mama Tsimba na bana ya yandi ba tatamana ti mambu salama mutindu ina.
Na manima ina, ba pesaka madia na bantu ina vuandiki kuna. Nionso vuandiki (ngombe na lumatu, mbisi ya kukalinga, susu ya ku yoka, saka-saka, madeso, kuanga ya tiya ina, mpe na makondi ya mbuaki...) na malafu mpe ya mutindu na mutindu (malafu ya mbuaki ya sovinco, Baron de Madrid mpe, Ngok le choc, primus, Mutzig, kronembourg...). Bantu kudiaka, mpe bafulukaka. Bakunuaka mpe ba languaka.
Ntangu ba mama ndoyi ya muziki ya Mama Tsimba kumaka, matanga bandaka ntama. Bau dasukaka na mambu ina, samu ti bau zolaka ba talana na ntangu ya mabina ya nkotolo. Ni yau ina bakotaka na kati-kati ya bantu nioso ina vuandiki kuna, ata soni ve! Ba bandaka na kubina mutindu bilau. Ba pesaka nsayi na mpangi ya bau mama Tsimba, mpe ba sepelisaka yandi te ee na mpimpa.
Kasi, ina tangu vuandi luta, ba nkento ya musiki vuandi nsoka ba malafu, na madia na kati ya bitunga, na ba pokoti ya bau samu na kunata mua ndambu na inzo, samu na tata, na bana ina bikanaka na inzo.
Bampangi ya luzolo, na buala ni mutindu ina ba matanga me kumaka kulutila. Kana nge sala mua matanga, nge fuana zaba ti nge ke dikila ba ina nge bokilaka, na ba ina bikana na ba inzo. Ni yau ina nge fuana yilama ya nge.
Ya kele songi-songi ve kaka mua disolo ya mambu ina ke lutaka na nzila ina beto ke vuandaka.
Matondo ba mpangi, beno bikana mbote .